ⵉⵎⴰⵢⵏⵓⵜⵏ : ⵏⵙⵙⴷⵓⵙ ⵜⴰⵙⵏⵜⴰⵢⵜ ⵏ ⴱⴰⴱ ⵏ ⵡⴰⴷⴷⵓⵔ ⴰⴳⵍⵍⵉⴷ ⵎⵓⵃⵎⵎⴰⴷ ⵡⵉⵙⵙ ⵙⴹⵉⵙ ⵍⵍⵉⵖ ⵉⵙⵏⵚⴱ ⵉⵅⴼ ⵏ ⵓⵙⴳⴳⵯⴰⵙ ⴰⵎⴰⵣⵉⵖ

ⵉⵜⵜⵓⵙⴽⴰⵔ ⵓⵙⵇⵇⵉⵎ ⴰⴼⵉⴷⵉⵕⴰⵍⵉ ⵏ ⵜⵎⴰⴳⵔⴰⵡⵜ ⵜⴰⵎⴰⵢⵏⵓⵜ ⵙ ⵜⵖⴰⵔⴰⵙⵜ ⵜⴰⵍⵉⴽⵜⵕⵓⵏⵉⵜ ⵙⴳ ⵜⵓⴳⴳⵓⴳⵜ ⴰⵙⵙ ⵏ ⵓⵙⵉⴹⵢⴰⵙ 23 ⴰⴱⵔⵉⵍ 2973 ⵏⵏⴰ ⵉⵎⵙⴰⵙⴰⵏ ⴷ 06 ⵎⴰⵢ 2023 ⵜⴰⵙⵙⵓⵜⵍⵜ ⵏ ⵓⵎⵖⵏⴰⵙ ⵄⵍⵉ ⵉⴽⴽⵏ, ⵉⴳⴰ ⵓⵙⵇⵇⵉⵎ ⴰⴷ ⵡⴰⵍⵍⵉ ⵖ ⵉⵜⵜⵓⵎⵔⴰⵔⴰ ⵡⴰⵡⴰⵍ ⵅⴼ ⵡⴰⴷⴷⴰⴷ ⴰⴳⵏⵙⴰⵏ ⵏ ⵜⵎⴰⴳⵔⴰⵡⵜ ⵜⴰⵎⴰⵢⵏⵓⵜ ⴷ ⵜⵣⴷⴰⵢⵜ ⵏⵏⵙ ⴷ ⵡⴰⴷⴷⴰⴷ ⵏ ⵉⵣⵔⴼⴰⵏ ⵏ ⵉⵎⴰⵣⵉⵖⵏ ⴷ ⵓⴱⵓⵖⵍⵓ ⵏ ⵜⵎⵏⵜⵉⵍⵜ ⵜⴰⵎⴰⵣⵉⵖⵜ ⴳ ⵍⵎⵖⵔⵉⴱ ⴷ ⵓⵎⴰⵢⵏⵓ ⴰⵙⵜⵕⴰⵜⵉⵊⵉ ⵓⵍⴰ ⵜⵉⵙⵏⵜⴰⵢ ⴷⵉⵙ ⵉⵣⴷⵉⵏ, ⴳ ⵢⴰⵏ ⵓⵎⵔⴰⵔⴰ ⵏ ⵡⴰⵡⴰⵍ ⵉⴷⵓⵙⵏ ⴳⵔ ⵉⵎⵖⵏⴰⵙⵏ ⴷ ⵜⵎⵖⵏⴰⵙⵉⵏ ⵏ ⵜⵎⴰⴳⵔⴰⵡⵜ ⵜⴰⵎⴰⵢⵏⵓⵜ ⴰⵔ ⵏⵜⵜⵉⵏⵉ ⵉ ⵓⴳⴷⵓⴷ ⴰⴽⴽⵯ :

01 – ⵎⴰⵙ ⵔⴰⴷ ⵉⵜⵜⵓⵙⴽⴰⵔ ⵓⴱⵔⴰⴳⵔⴰⵡ ⴰⴼⵉⴷⵉⵕⴰⵍⵉ ⵡⵉⵙⵙ 14 ⵏ ⵜⵎⴰⴳⵔⴰⵡⵜ ⵜⴰⵎⴰⵢⵏⵓⵜ ⵓⵙⵙⴰⵏ ⵏ 03 ⴷ 04 ⵢⵓⵏⵢⵓ 2023 ⴳ ⵜⵖⵔⵎⵜ ⵏ ⵓⴳⴰⴷⵉⵔ ⵎⴰ ⴰⵏⵏ ⴰⴼⴰⵔ ⵏⵜⵜⵉⵏⵉ ⵉ ⵉⵎⵖⵏⴰⵙⵏ ⴷ ⵜⵎⵖⵏⴰⵙⵉⵏ ⴰⴽⴽⵯ ⴰⴼⴰⴷ ⴰⴷ ⴰⵡⵙⵏ ⴳ ⵓⵙⵎⵓⵔⵙ ⵏ ⵓⴱⵔⴰⴳⵔⴰⵡ ⴰⴷ , ⵎⴽⵍⵍⵉ ⵔⴰⴷ ⵏⵉⵏⵉ ⴰⵎⴰⵢⵏⵓ ⵉⵣⴷⵉⵏ ⴷ ⵓⴱⵔⴰⴳⵔⴰⵡ ⴰⴷ ⴳ ⵓⵙⵙⴰⵏ ⴷ ⵢⵓⵛⴽⴰⵏ .

02- ⵏⵙⵙⴷⵓⵙ ⵜⴰⵙⵏⵜⴰⵢⵜ ⵏ ⴱⴰⴱ ⵏ ⵡⴰⴷⴷⵓⵔ ⴰⴳⵍⵍⵉⴷ ⵎⵓⵃⵎⵎⴰⴷ ⵡⵉⵙⵙ ⵙⴹⵉⵙ ⵍⵍⵉⵖ ⵉⵙⵏⵚⴱ ⵉⵅⴼ ⵏ ⵓⵙⴳⴳⵯⴰⵙ ⴰⵎⴰⵣⵉⵖ ⵉⵙⴽⵔ ⴳⵉⵙ ⴰⵙⵓⵏⴼⵓ ⴰⵏⴰⵎⵓⵔ , ⵉⴳ ⵎⴰ ⴰⴷ ⵢⴰⵏ ⵙⴳ ⵉⵙⵙⵓⵜⵓⵔⵏ ⵉⵎⵣⵔⵓⵢⴰⵏⵏ ⵏ ⵜⵎⴰⴳⵔⴰⵡⵜ ⵉⴳ ⵓⵍⴰ ⵜⴰⵡⴰⵔⴳⵉⵜ ⵏⵏⴰ ⵉⴳⴰⵏ ⵜⵉⴷⵜ ⵖⵉⵍⴰⴷ , ⵙⵍⴰⵡⴰⵏ ⴰⴽⴽⵯ ⵍⵍⵉⵖ ⴼⵍⵍⴰⵙ ⴰⴽⴽⵯ ⵙⵖⵏⵙⴰⵏ ⵉⵎⵖⵏⴰⵙⵏ ⴷ ⵜⵎⵖⵏⴰⵙⵉⵏ ⵏ ⵜⵎⴰⴳⵔⴰⵡⵜ ⵜⴰⵎⴰⵢⵏⵓⵜ .

03- ⵏⵎⵎⵔ ⵙ ⵜⵢⴰⴼⵓⵜⵉⵏ ⵏⵏⴰ ⴰⴽⴽⵯ ⴰⴽⴽⴰⵏ ⵡⴰⵢⵢⴰⵡⵏ ⵏ ⵜⵎⴰⴳⵔⴰⵡⵜ ⵜⴰⵎⴰⵢⵏⵓⵜ ⴰⴼⴰⴷ ⴰⴷ ⴳⵉⵏ ⵉⵎⵖⵏⴰⵙⵏ ⴷ ⵜⵎⵖⵏⴰⵙⵉⵏ ⵉⴷⵔⴼⴰⵢ ⵙⵖⵏⵙⴰⵏ ⴰⵡⴷ ⵅⴼ ⵓⵙⴱⵓⵖⵍⵓ ⵏ ⵓⵙⵡⵉⵔ ⵏ ⵓⵖⵔⴼ ⴰⵎⴰⵣⵉⵖ ⵙ ⴽⵓ ⴰⵏⴰⵡⵏ ⵏ ⵜⵖⵏⵙⴰ ⵏⵏⴰ ⵜⵜⴳⴳⴰⵏ, ⵣⵓⵏ ⴰⴽⴽⵯ ⵜⴰⵖⵏⵙⴰ ⵏⵏⵙⵏ ⴰⴼⴰⴷ ⴰⴷ ⵉⴳ ⵡⴰⵙⵙ ⵏ ⵉⵅⴼ ⵏ ⵓⵙⴳⴳⴰⵙ ⴰⵎⴰⵣⵉⵖ ⵢⴰⵜ ⵜⴼⵓⴳⵍⴰ ⵜⴰⵏⴰⵎⵓⵔⵜ ⴷ ⵓⵙⵓⵏⴼⵓ ⵏⵏⴰ ⵅⴼ ⵉⵍⵍⴰ ⵓⵙⵓⵏⴼⵓ , ⵎⴽⵍⵍⵉ ⵏⵙⵙⵔⵖⵓⴷ ⴰⴽⴽ ⴰⴳⴷⵓⴷ ⴰⵎⵖⵔⵉⴱⵉ ⵙ ⵓⵙⵏⵚⴱ ⵏ ⵡⴰⵙⵙ ⴰⴷ ⴰⵏⴰⵎⵓⵔ .

4- ⵏⵣⵎⵎⵉⵎ ⴰⵡⴷ ⵍⵍⵉⵖ ⵏⵏ ⵎⴰⵟⵍⵏ ⵉⵙⵍⴳⴰⵏⵏ ⵉⵙⵏⵎⴰⵍⴰⵢ ⵏ ⵓⵙⵏⵚⴱ ⵏ ⵜⵎⴰⵣⵉⵖⵜ ⴷ ⵉⵡⵏⵏⵉⵜⵏ ⴰⴽⴽⵯ ⵓⵏⴱⵉⴹⵏ ⵏⵏⴰ ⴷ ⵉⴷⴷⴰⵏ ⴷⴼⴼⵉⵔ ⵏ ⵓⵙⴽⴽⵉⵔ ⵏ ⵓⵙⵍⴳⵏ 26.16 ⵏⵏⴰ ⵓⵔ ⵉⵎⵙⴰⵙⴰⵏ ⴷ ⵓⴷⵓⵙⵜⵓⵔ ⵓⵍⴰ ⴰⵡⴷ ⴷ ⵉⵙⵍⴳⴰⵏⵏ ⵉⵙⵏⵎⴰⵍⴰⵢ ⵏⵏⴰ ⵅⴼ ⵏⵙⴰⵡⵍ , ⵙ ⵓⵎⴷⵢⴰ ⴰⵙⵍⴳⵏ ⵏ 38.15 ⵏⵏⴰ ⵉⵣⴷⵉⵏ ⴷ ⵓⵏⵎⴰⵍⴰ ⴰⵣⵔⴼⴰⵏ ⴷ ⵎⴰⴷ ⴷⵉⵙ ⵉⵎⵓⵏⵏ ⵏ ⵜⵎⵙⵙⴽⵜⵉⵢⵉⵏ ⵜⵓⵏⴱⵉⴹⵉⵏ ⵏⴰⵏ ⴷⵉⵙ ⴰⴽⴽⵯ ⵓⵔ ⵉⵎⵙⴰⵙⴰⵏ ⴰⵎ ⴰⵙⴷⵓⵙ ⵏ ⵜⵎⵜⵜⴰ 14, ⴰⵔ ⵏⵜⵜⵉⵏⵉ ⵎⴰⵙⴷ ⵉⵙⵍⴳⴰⵏⵏ ⴰⴷ ⴰⴽⴽⵯ ⴰⵔ ⵏⵏ ⵙⴰⴳⴳⵓⴳⵏ ⵜⵉⵙⵏⵜⴰⵢⵉⵏ ⵜⵓⵏⴱⵉⴹⵉⵏ ⵏ ⵓⵙⵏⵚⴱ ⵏ ⵜⵓⵜⵍⴰⵢⵜ ⵜⴰⵎⴰⵣⵉⵖⵜ ⴷ ⵉⵙⵍⴳⴰⵏⵏ ⴷⵉⵙ ⵉⵣⴷⵉⵏ .

05- ⴰⵔ ⵏⵜⵜⵉⵏⵉ ⵎⴰⵙⴷ ⴰⴱⵔⵉⴷ ⵏ ⵜⵖⵏⵙⴰ ⵉⵙⵓⵍ ⵉⵖⵣⵣⵉⴼ ⴳ ⵎⴰⴷ ⵉⵥⵍⵉⵏ ⵙ ⵓⵏⵣⴰⵖ ⵅⴼ ⵉⴽⴰⵍⵉⵡⵏ ⴷ ⵜⵙⵔⵜⵉⵜⵉⵏ ⴷ ⵓⵣⵔⴼ ⵅⴼ ⵉⵙⵓⴳⴰⵎ ⵏ ⵜⵡⵏⵏⴰⴷⵜ ⴷ ⵜⴰⴳⴰⵏⵉⵏ , ⵙⵍⴰⵡⴰⵏ ⴰⴽⴽⵯ ⴰⵎⴰⵢⵏⵓ ⵏⵏⴰ ⵉⵍⵍⴰⵏ ⴳ ⵜⵎⴰⵣⵉⵔⵜ ⵏⵏⵖ ⴳ ⵉⵙⴳⴳⵯⴰⵙⵏ ⴰⴷ ⵉⵣⵔⵉⵏ ( ⵜⴰⵢⵙⵙⴰ ⴷ ⵉⵊⴰⴽⴰⵏⵏ ⵏⵏⴰ ⵉⵜⵜⴰⵡⵉⵏ ⵉⴽⴰⵍⵉⵡⵏ ⵏ ⵉⵡⴷⴰⵏ ⴷ ⵉⵎⴰⴷⴰⵏⵏ ⵉⵎⵣⵡⵓⵔⴰ ⴷ ⵓⵣⵣⵔⴰⵢ ⵏ ⵓⵖⴱⴰⵍⵓ ⵏ ⴱⵓ ⵜⴱⵓⵇⵇⴰⵍⵜ ⵉ ⵢⴰⵜ ⵜⴷⵔⴰⵡⵜ ⴰⴼⴰⴷ ⴰⴷ ⵜⵙⵙⴳⴷⵣ ⴰⵎⴰⵏ ⵏⵏⵙ , ⴰⵖⴱⴰⵍⵓ ⴰⴷ ⵏⵏⴰ ⵉⴳⴰⵏ ⴰⵙⴰⴳⵯⵎ ⴰⴷⵙⵍⴰⵏ ⵏ ⵓⴳⴳⵓⴳ ⵏ ⵢⵓⵙⴼ ⴱⵏ ⵜⴰⵛⴼⵉⵏ … ) .

06- ⴰⵔ ⵏⵜⵜⵉⵏⵉ ⵉ ⴰⴽⴽⵯ ⵉⵏⵎⵎⴰⵙⵙⵓⵜⵏ ⴷ ⵉⵎⵙⵜⴳⴳⴰⵔⵏ ⴷ ⵉⵎⴰⵣⵉⵖⵏ ⴰⴽⴽⵯ ⴰⴷ ⵙⵙⴷⵓⵙⵏ ⵜⵉⵡⵡⵓⵔⵉⵡⵉⵏ ⵏⵏⵙⵏ ⵏ ⵓⵏⵣⴰⵖ ⵅⴼ ⵜⵎⴰⵣⵉⵖⵜ ⴷ ⵜⵎⵏⵜⵉⵍⵜ ⵏⵏⵖ ⵜⴰⵣⵔⴼⴰⵏⵜ ⵏⵏⴰ ⵢⵓⵙⵉⵏ ⵉⵜⴳⴰⵔⵏ ⵏ ⵓⵙⵎⴰⵢⵏⵓ ⴷ ⵜⵎⴰⵜⵔⴰⵔⵜ .

ⴰⵙⵇⵇⵉⵎ ⴰⴼⵉⴷⵉⵕⴰⵍⵉ
23 ⴰⴱⵔⵉⵍ 2973 ⵏⵏⴰ ⵉⵎⵙⴰⵙⴰⵏ ⴷ 06 ⵎⴰⵢⵢⵓ 2023