“ⴱⵉⵢⵍⵎⴰⵡⵏ, ⴰⴽⴰⵕⵏⴰⴼⴰⵍ ⴰⴳⵔⴰⵖⵍⴰⵏ ⵏ ⵓⴳⴰⴷⵉⵔ” ⵉⵙⵎⴷ ⵜⵉⵡⵓⵔⵉⵡⵉⵏ ⵏ ⵜⵙⵓⵜⵍⵜ ⵏⵏⵙ ⵜⴰⵎⵣⵡⴰⵔⵓⵜ

ⵙⵎⴷⵏⵜ ⵜⵡⵓⵔⵉⵡⵉⵏ ⵏ ⵜⵙⵓⵜⵍⵜ ⵜⴰⵎⵣⵡⴰⵔⵓⵜ ⵏ “ⴱⵉⵢⵍⵎⴰⵡⵏ, ⴰⴽⴰⵕⵏⴰⴼⴰⵍ ⴰⴳⵔⴰⵖⵍⴰⵏ ⵏ ⵓⴳⴰⴷⵉⵔ” ⴷⴰ ⵜⵙⵏⵎⴰⵍⴰ ⵜⴳⵔⴰⵡⵜ ⵏ ⵓⴳⴰⴷⵉⵔ ⴷ ⵡⴰⵎⵎⴰⵙ ⵙⵓⵙ ⵎⴰⵙⵙⴰ ⵉ ⵜⴳⵎⵉ ⵜⴰⴷⵍⵙⴰⵏⵜ ⵙ ⵜⵏⴰⵍⵉⵜ ⵏ ⵜⵎⵏⴰⴹⵜ ⵙⵓⵙ ⵎⴰⵙⵙⴰ ⴷ ⵜⵎⴰⵡⴰⵙⵜ ⵏ ⵜⵄⵄⵓⵔⵎⴰ ⴷ ⵜⴷⵍⵙⴰ ⴷ ⵓⵎⵢⴰⵡⴰⴹ ⴷ ⵓⵙⵇⵇⵉⵎ ⴰⵏⵎⵏⴰⴹ ⵏ ⵜⵎⴰⵍⵍⴰⵢⵜ, ⵙⴳ 20 ⴰⵔ 23 23 ⵢⵓⵍⵢⵓⵣ 2023.

ⵉⵡⴰⵜⵜⵙ “ⴱⵉⵢⵍⵎⴰⵡⵏ, ⴰⴽⴰⵕⵏⴰⴼⴰⵍ ⴰⴳⵔⴰⵖⵍⴰⵏ ⵏ ⵓⴳⴰⴷⵉⵔ” ⴰⴼⵔⴰⴳ ⵏ ⵡⴰⵢⴷⴰ ⴰⵔⴽⵎⴰⵎ ⵏ ⵜⵎⵏⴰⴹⵜ ⵏ ⵙⵓⵙ ⵎⴰⵙⵙⴰ ⴷ ⵓⵙⴱⵓⵖⵍⵓ ⵏⵏⵙ ⴰⴼⴰⴷ ⴰⴷ ⵉⴳ ⵜⴰⵎⵙⵙⵉⵍⵉⵜ ⵜⴰⵏⴳⵎⵓⵜ ⵉ ⵓⵙⴳⴷⵣ ⵏ ⵜⵖⵔⵎⵜ ⵏ ⵓⴳⴰⴷⵉⵔ ⴰⵎ ⵜⴰⵎⴰⵥⵓⵏⵜ ⵜⴰⴳⵔⴰⵖⵍⴰⵏⵜ ⵏ ⵜⴷⵍⵙⴰ ⵜⴰⵎⴰⵣⵉⵖⵜ.

ⴳ ⵜⵙⵓⵜⵍⵜ ⴰⴷ ⵢⴰⵏ ⵓⵖⴰⵡⴰⵙ ⴰⵎⵏⴰⵡⴰⵢ ⵉⴷⴷⵖ ⵉⵜⵜⵓⵙⵏⵎⴰⵍⴰ ⵓⵙⵓⵏ ⵏ ⵓⴽⴰⵕⵏⴰⴼⴰⵍ ⴳ ⵜⵓⵔⵜⵉⵜ ⵏ ⴱⵏ ⵣⴰⵢⴷⵓⵏ, ⵍⵍⵉⴳ ⵍⵍⴰⵏⵜ ⵜⵓⴳⵜ ⵏ ⵜⵙⴰⵡⵔⵉⵏ ⵜⵉⵥⵓⵕⴰⵏⵉⵏ ⵉⵥⵍⵉⵏ ⵙ ⵜⵏⵉⴹⵉ ⴷ ⵜⵎⴳⵓⵔⵉ ⵜⴰⵣⵣⵓⵍⴰⵏⵜ ⵉⵣⴷⵉⵏ ⴷ ⴱⵉⵢⵍⵎⴰⵡⵏ ⴷ ⵜⵙⵓⵏⵉⵡⵉⵏ ⴷ ⵜⵎⵍⵙⴰ, ⴰⵡⴷ ⴰⵙⴼⵙⵔ ⵏ ⵉⵡⵍⴰⴼⵏ ⵉⵎⵣⵔⴰⵢⵏ ⵏ ⵉⵙⴼⵓⴳⵍⵓⵜⵏ ⵏ ⴱⵉⵢⵍⵎⴰⵡⵏ, ⴷ ⵜⵉⵍⴰⵍ ⵜⵉⵥⵓⵕⴰⵏⵉⵏ ⴳⴳⵏⵜ ⵜⵔⵓⴱⴱⴰ ⵏ ⵜⴰⵢⵙⵉ ⵜⴰⴷⵖⵔⴰⵏⵜ. ⵙⵙⴱⵖⵔⵏ ⴳ ⵜⵉⵍⴰⵍ ⵏ ⵓⵙⵓⵏ ⴰⴷ ⵓⴳⴳⴰⵔ ⵏ 32 ⵏ ⵢⵉⴼⴹ ⵏ ⵓⵏⵔⵣⴰⴼ ⴳ ⵡⵓⵙⵙⴰⵏ ⵏ ⵓⵎⵓⵙⵙⵓ.

ⵎⴽⵍⵍⵉ ⵜⴻⵜⵜⵓⵙⵏⵎⴰⵍⴰ ⵢⴰⵜ ⵜⵉⵏⴰⵡⵜ ⵜⴰⵎⴰⵙⵙⴰⵏⵜ ⵜⴰⴳⵔⴰⵖⵍⴰⵏⵜ ⴳ ⵙⵙⵉⵏⵉⵎⴰ ⵚⴰⵃⴰⵕⴰ ⴳ ⵜⵓⴷⴷⵓⵔⵜ ⵏ ⵜⴰⵍⴱⵕⵊⵜ ⵙⵎⵓⵜⵜⴳⵏ ⵜⵜ ⵉⴽⴰⴷⵉⵎⵉⵜⵏ ⵉⵎⵖⵔⴰⴱⵉⵢⵏ ⴷ ⵉⵎⵔⵣⵓⵜⵏ ⵙⴳ ⵍⴰⵍⵎⴰⵏ, ⴷ ⴼⵕⴰⵏⵚⴰ, ⴷ ⵜⴳⵣⵉⵔⵉⵏ ⵜⵉⴽⵏⴰⵔⵉⵢⵉⵏ, ⵙⵉⵡⵍⵏ ⵅⴼ ⵜⵎⵙⴽⵉⵔⵉⵏ ⵜⵉⴷⵍⵙⴰⵏⵉⵏ ⵏ ⴱⵉⵢⵍⵎⴰⵡⵏ ⴷ ⵜⵏⵏⵓⵣⵖⴰ ⵜⴰⴷⵖⵔⴰⵏⵜ, ⵢⵉⵍⵉ ⴷⵉⴳⵙ ⵓⴳⴳⴰⵔ ⵏ 200 ⵏ ⵉⵡⴷⴰⵏ.

ⵢⵉⵡⵙ ⴳ ⵓⴽⴰⵕⵏⴰⴼⴰⵍ ⵉⵣⵔⵉⵏ ⴳ ⵓⵙⵓⴽ ⵏ ⵎⵓⵃⵎⵎⴰⴷ ⵡⵉⵙ ⵙⵎⵎⵓⵙ, 1500 ⵏ ⵓⵎⴰⴷⵔⴰⵡ ⵉⵙⵎⴷⵢⴰⵜⵏ ⵏ 31 ⵏ ⵓⴽⴰⵕⵏⴰⴼⴰⵍ ⵙⴳ ⵓⴳⴰⴷⵉⵔ, ⴰⵡⵔⵉⵔ, ⴷⴷⵛⴰⵢⵔⴰ, ⵉⵏⵣⴳⴳⴰⵏ, ⴰⵢⵜ ⵎⵍⵍⵓⵍ, ⵜⵜⵎⵙⵉⵢⴰ, ⵍⵇⵍⵉⵄⴰ, ⵉⵎⵉ ⵏ ⵜⴰⵏⵓⵜ, ⴰⵎⵣⵎⵉⵣ, ⵜⵉⵣⵏⵉⵜ, ⴱⵉⵢⴳⵯⵔⴰ ⴷ 21 ⵏ ⵜⵔⴰⴱⴱⵓⵜ ⵏ ⵜⴰⵢⵙⵉ ⵙⴳ ⵓⴷⵖⴰⵔ ⵏ ⵙⵓⵙ ⴷ ⵉⴼⴼⵓⵙ ⵏ ⵍⵎⵖⵔⵉⴱ ⴰⵡⴷ ⵜⴰⵙⵎⴷⵢⴰⵜ ⵏ ⵜⵎⵙⵎⵓⵏⵜ ⵏ ⵉⴼⵔⵉⵇⵉⵢⵏ ⵉⴼⴼⵓⵙ ⵏ ⵜⵏⵣⵔⵓⴼⵜ ⴷ ⵉⵎⴰⵍⵍⴰⵢⵏ ⵏ ⴱⵕⵕⴰ, ⵉⴷⴷⵖ ⵉⵍⵍⴰ ⵓⵙⴼⵙⵔ ⵏ ⵉⴼⵉⵍⵏ ⵉⵥⵓⵕⴰⵏⵏ ⵉⵎⵙⵏⴼⵍⵓⵍⵏ ⵉⵎⵏⴰⵡⴰⵢⵏ ⵉⵥⵍⵉⵏ ⵙ ⵓⵎⵣⵔⵓⵢ ⵏ ⵜⴰⵢⵙⵉ ⵏ ⴱⵉⵢⵍⵎⴰⵡⵏ, ⵙ ⵜⵉⵍⵉⵜ ⵏ ⵓⴳⴷⵓⴷ ⵉⵣⵔⵉⵏ 85 ⵏ ⵢⵉⴼⴹ ⵏ ⵢⴰⵏ.

ⵉⵙⵎⴷ ⵓⵎⵓⵙⵙⵓ ⴰⴷ ⵙ ⵙⵉⵏ ⵉⵡⵉⵣⵏ ⵉⵥⵓⵕⴰⵏⵏ ⴳ ⵙⵉⵏ ⵡⵓⵙⵙⴰⵏ, ⴳ ⵓⴱⴰⵔⴰⵣ ⵏ ⵍⴰⵎⴰⵍ, ⵙ ⵓⴷⵔⴰⵡ ⵏ ⵉⵜⵔⴰⵏ ⵉⵎⵇⵇⵔⴰⵏⵏ ⵏ ⵜⵥⵓⵕⵉ ⵜⴰⵎⴰⵣⵉⵖⵜ ⴰⵡⴷ ⵜⵉⵔⵓⴱⴱⴰ ⵏ ⵓⵥⴰⵡⴰⵏ ⵏ ⵜⴰⵢⵙⵉ ⵜⴰⴷⵖⵔⴰⵏⵜ, ⴷ ⵜⵏⴰⵎⵓⵔⵜ ⵖⵓⵔ ⵜⴰⵖⵍⴰⵖⴰⵍⵜ ⵜⴰⴳⵔⴰⵖⵍⴰⵏⵜ, ⵉⵎⵔⴰⵔⴰ ⴷⵉⵙⵏⵜ ⵓⴳⴷⵓⴷ ⵉⵣⵔⵉⵏ 200 ⵏ ⵢⵉⴼⴹ ⵏ ⵢⴰⵏ.

ⴷⴰ ⵜⵙⵙⵏⴽⴰⴷ ⵜⵎⵙⵙⵓⴳⵓⵔⵜ ⵏ “ⴱⵉⵢⵍⵎⴰⵡⵏ, ⴰⴽⴰⵕⵏⴰⴼⴰⵍ ⴰⴳⵔⴰⵖⵍⴰⵏ ⵏ ⵓⴳⴰⴷⵉⵔ” ⵉⵙⵏⵉⵎⵎⵉⵔⵏ ⵏⵏⵙ ⵉ ⵜⵉⴷ ⴷ ⵡⵉⴷ ⴰⴽⴽⵯ ⵢⵉⵡⵙⵏ ⴳ ⵓⵎⵓⵔⵙ ⵏ ⵜⵙⵓⵜⵍⵜ ⵜⴰⵎⵣⵡⴰⵔⵓⵜ: ⵜⴰⴳⵔⴰⵡⵜ ⵏ ⵓⴳⴰⴷⵉⵔ, ⴰⵙⵇⵇⵉⵎ ⵏ ⵜⵎⵏⴰⴹⵜ ⵏ ⵙⵓⵙ ⵎⴰⵙⵙⴰ, ⵜⴰⵎⴰⵡⴰⵙⵜ ⵏ ⵜⵄⵄⵓⵔⵎⴰ ⴷ ⵜⴷⵍⵙⴰ ⴷ ⵓⵎⵢⴰⵡⴰⴹ, ⴰⵎⵎⴰⵙ ⵏ ⵙⵓⵙ ⵎⴰⵙⵙⴰ ⵉ ⵜⴳⵎⵉ ⵜⴰⴷⵍⵙⴰⵏⵜ, ⴰⵙⵇⵇⵉⵎ ⴰⵏⵎⵏⴰⴹ ⵏ ⵜⵎⴰⵍⵍⴰⵢⵜ, ⵉⵙⵍⵎⴰⴷⵏ ⵉⵎⵥⵥⴰⵡⵕⵏ, ⵜⴰⵙⵇⵇⵉⵎⵜ ⵏ ⵜⵏⴱⴹⴰⵢⵜ, ⵉⴼⵔⴷⵉⵙⵏ ⴰⴽⴽⵯ ⵏ ⵜⵏⵖⵎⴰⵙⵜ ⴷ ⵎⴰⵕⵕⴰ ⵉⵎⴰⴷⵔⴰⵡⵏ ⴳ ⵓⵎⵓⵙⵙⵓ ⴰⴷ.

ⵎⴽⵍⵍⵉ ⵜⵙⵉⵎⵖⵓⵔ ⵜⵎⵙⵙⵓⴳⵓⵔⵜ ⵏ “ⴱⵉⵢⵍⵎⴰⵡⵏ, ⴰⴽⴰⵕⵏⴰⴼⴰⵍ ⴰⴳⵔⴰⵖⵍⴰⵏ ⵏ ⵓⴳⴰⴷⵉⵔ” ⵙ ⵜⵣⵎⵎⴰⵔ ⴰⵜⵜⵓⵢⵏⵉⵏ ⵏⵏⴰ ⵜⴳⴳ ⵍⵡⵉⵍⴰⵢⴰ ⵏ ⵙⵓⵙ ⵎⴰⵙⵙⴰ ⴳ ⵓⴹⴼⴼⵓⵕ ⴷ ⵓⵙⵏⴰⵍ, ⵜⵉⵏⴱⴰⴹⵉⵏ ⵜⵉⴷⵖⵔⴰⵏⵉⵏ, ⵜⴰⵏⴼⵔⵓⵜ ⵜⴰⵏⴰⵎⵓⵔⵜ ⴷ ⵜⴰⴳⴳⴰⵍⵉⵏ ⵜⵉⵎⴰⵡⴰⵙⵉⵏ, ⴰⵔⴰⵢ ⵓⵖⵔⵉⵎ, ⵉⵎⵙⵙⵓⴳⴰⵔ ⵏ ⵜⵎⴰⵡⴰⵙⵜ ⵏ ⵜⴷⵓⵙⵉ. ⴰⵏⵎⵓⵇⵇⴰⵔ ⵏⵏⵖ ⴰⵙⴳⴳⵯⴰⵙ ⴷ ⵢⵓⵙⴰⵏ ⴰⴽⴷ ⵜⵉⵡⵓⵔⵉⵡⵉⵏ ⵏ ⵜⵙⵓⵜⵍⵜ ⵜⵉⵙ ⵙⵏⴰⵜ.