ⴰⵍⵖⵓ ⴰⵖⵎⵙⴰⵏ : ⵜⵙⴷⴰⵡⵉⵜ ⵏ ⵓⵏⴱⴷⵓ ⵏ ⵉⴼⵏⵉ ⵏ ⵜⵎⵙⵎⵓⵏⵜ ⵉⵙⵏⵉ ⵏ ⵡⵓⵔⵖ

ⵙⵎⴰⵔⵏⵜ ⵜⵡⵡⵓⵔⵉⵡⵉⵏ ⵏ ⵜⵙⴷⴰⵡⵉⵜ ⵏ ⵓⵏⴱⴷⵓ ⵏ ⵉⴼⵏⵉ, ⴼ ⵡⴰⵏⵢⴰ ⵏ ⵜⵖⵓⵔⵉ ⵏ ⵓⵙⵙⴷⵓⵙ ⵏ ⵜⵉⵔⵎⵉⵜ ⴰⴷ, ⴷ ⴰⴷ ⵜⴳ ⵢⴰⵏ ⵓⵙⴰⵖⵓⵍ ⵍⵍⵉ ⵙ ⵔⴰⴷ ⵢⵉⵍⵉ ⵓⵙⵙⵏⵚⴱ ⵏ ⵓⵏⵙⴰⵢ ⴰⴷ ⴰⴽⴰⴷⵉⵎⵉ ⴷ ⵓⵏⴰⵥⵓⵕ ⴳ ⵜⵖⵔⵎⵜ ⵏ ⵙⵉⴷⵉ ⵉⴼⵏⵉ.
ⴰⵎⵓⵙⵙⵓ ⴰⴷ ⵎⵉ ⵜⵜⵓⵙⴽⴰⵔ ⵜⵙⵙⵓⵜⵍⵜ ⵏⵏⵙ ⵜⴰⵎⵣⵡⴰⵔⵓⵜ ⴳ ⵡⵓⵙⵙⴰⵏ ⴳⵔ 26 ⴷ 28 ⵢⵓⵍⵢⵓⵣ 2023 ⴳ ⵜⵖⵔⵎⵜ ⵏ ⵙⵉⴷⵉ ⵉⴼⵏⵉ, ⵏⵏⴰ ⴳ ⵉⵜⵜⵓⵙⴽⴰⵔ ⵓⵕⵥⵥⵓⵎ ⵍⵍⵉ ⵉⵎⵎⴳⵏⵜ ⵓⵏⵖⵍⴰⴼ ⵏ ⵙⵉⴷⵉ ⵉⴼⵏⵉ ⴷ ⵓⵏⵙⵙⵉⵅⴼ ⵏ ⵓⵙⵇⵇⵉⵎ ⴰⵙⴳⴰⵡⴰⵏ ⵏ ⵙⵉⴷⵉ ⵉⴼⵏⵉ ⴷ ⵉⵎⵙⵜⴰⵢⵏ ⴷ ⵉⵎⵙⵙⵎⵏⴰⴷⵏ ⵏ ⵜⵏⴰⴼⵓⵜⵉⵏ ⵏ ⴱⵕⵕⴰ ⴳ ⵜⵙⴳⴰ ⴷ ⵉⵎⵍⵜⴰⵖⵏ ⵏ ⵜⵎⵀⵍⴰ ⴳ ⵓⵙⵡⵉⵔ ⴰⵙⴳⴰⵡⴰⵏ ⴷ ⵓⵏⵎⵏⴰⴹ ⴷ ⵓⴷⵖⵔⴰⵏ.

ⴳ ⵜⴳⵓⵔⵉ ⵏ ⵓⵏⵖⵍⴰⴼ ⵍⵃⵙⵏ ⵙⵉⴷⵇⵉ, ⵉⵙⵙⵏⵜⵎ ⵎⴰⵙⴷ ⴰⵙⵏⵎⴰⵍⴰ ⵏ ⵜⵙⴷⴰⵡⵉⵜ ⵏ ⵓⴱⴷⵓ ⵏ ⵉⴼⵏⵉ ⵍⵍⵉ ⵜⵙⵏⵎⴰⵍⴰ ⵜⵎⵙⵎⵓⵏⵜ ⵏ ⵉⵙⵏⵉ ⵏ ⵡⵓⵔⵖ, ⵖ ⴳⵔ ⵜⵓⴳⵜⵜ ⵏ ⵉⵙⴼⵓⴳⵍⵓⵜⵏ ⵍⵍⵉ ⵜⵜⵓⵙⴽⴰⵔⵏⵉⵏ ⵙ ⵜⵎⵍⴷⴰ ⵏ ⵓⴽⵜⵜⴰⵢ ⵡⵉⵙⵙ ⵙⵉⵎⵔⴰⵡ ⴷ ⴽⴽⵓⵥ ⵏ ⵉⴳⵉⵡⵔ ⵏ ⴱⴰⴱ ⵏ ⵜⴰⵜⵜⵓⵢⵜ ⴰⴳⵍⵍⵉⴷ ⵎⵓⵃⵎⵎⴰⴷ ⵡⵉⵙⵙ ⵚⴹⵉⵚ ⴼ ⵓⵙⵙⴳⵍⴷ ⵏ ⵉⵎⵣⵡⵓⵔⴰ ⵏⵏⵙ, ⵔⴰ ⵉⵙⵙⴷⵓⵙ ⵜⵉⵎⴳⴳⵉⵜ ⵜⴰⴷⵍⵙⴰⵏⵜ ⵉ ⵉⵄⵔⵔⵉⵎⵏ ⴳ ⵜⵙⴳⴰ, ⵎⴽ ⵍⵍⵉ ⵏⵉⵜ ⵉⵍⵍⴰ ⵏⵜⵜⴰⵏ ⵙ ⵉⵅⴼ ⵏⵏⵙ ⴼ ⵓⵙⵖⵓⴷⵓ ⵏ ⵜⵔⴰⵜⵙⴰ ⵏ ⵜⵎⵔⵙⵍⵉⵏ ⵜⵉⴷⵍⵙⴰⵏⵉⵏ ⴳ ⵜⵙⴳⴰ ⴰⴷ. ⵎⴰ ⴰⴷ ⵉⴳⴰ ⴰⵢⵍⵍⵉ ⵔⴰⴷ ⵢⴰⵊⵊ ⴰⴷⴰⵙ ⴰⴷ ⵢⵉⵍⵉ ⵏ ⵜⵏⴰⴼⵓⵜⵉⵏ ⵜⵉⴷⵍⵙⴰⵏⵉⵏ ⵉ ⵉⵄⵔⵔⵉⵎⵏ.

ⵎⴽ ⵍⵍⵉ ⵉⵏⵏⴰ ⵓⵎⴰⵙⵙⴰⵢ ⴰⵎⵣⵡⴰⵔⵓ ⴳ ⵜⵙⴳⴰ, ⵎⴰⵙⴷ ⴰⵙⵜⴰⵢ ⵏ ⵙⵙⵉⵏⵉⵎⴰ ⴷⴰⵔ ⵜⵎⵙⵎⵓⵏⵜ ⴼ ⴰⴷ ⵉⴳ ⴰⵙⴰⴷⴼ ⵏ ⵜⵙⵙⵓⵜⵍⵜ ⵜⴰⵎⵣⵡⴰⵔⵓⵜ ⵏ ⵜⵙⴷⴰⵡⵉⵜ ⵏ ⵓⵏⴱⴷⵓ ⵏ ⵉⴼⵏⵉ, ⴰⵔ ⵉⵙⵙⵉⴳⵉⵣ ⵜⴰⵙⵡⵉⵏⴳⵎⵜ ⵏ ⵙⵙⵉⵏⵉⵎⴰ ⵎⴰⵙ ⵓⵔ ⵜⴳⵉ ⵖⴰⵙ ⵜⵉⵎⵥⵕⵉⵜ, ⵜⴳⴰ ⵓⵍⴰ ⵢⴰⵏ ⵉⵎⵉⵙⵙ ⵍⵍⵉ ⵉⵜⵜⴰⵡⵙⵏ ⴳ ⵜⵏⴼⵍⵉⵜ, ⴷ ⴰⵔ ⵜⵜⴰⵡⵙ ⴳ ⵜⴰⵏⵏⴰⵢⵜ ⵉⴷⵔⴰⵏ ⵉ ⵜⵏⴰⵎⵓⵏⵜ ⴷ ⵜⵏⴼⵍⵉⵜ,ⴷ ⵓⵙⵉⵙⵙⵏ ⵙ ⵜⵎⵏⴰⴹⵜ; ⵎⴰ ⴰⵏⵏ ⵙ ⵜⵖⴰⵔⴰⵙⵜ ⵏ ⵜⵡⵍⴰⴼⵜ, ⴷ ⵜⵉⴽⴽⵉ ⴰⴷⴰⵙ ⵏ ⵜⵎⴰⴳⵉⵜ ⴷ ⵓⵖⵔⵎⴰⵏ ⵉ ⵜⵖⵔⵎⵜ. ⵣⵓⵏⴷ ⵜⵉⵍⴰⵍⴰ ⴰⴷ ⵟⵟⴰⴼⵏⵜ ⵢⴰⵏ ⵡⴰⵜⵉⴳ ⴱⴰⵀⵔⴰ ⵎⵇⵇⵓⵔⵏ ⴼⴰⴷ ⴰⴷ ⵜⵉⵍⵉ ⵜⴰⵎⵓⵏⵜ ⴼ ⵜⵏⴼⵍⵉⵜ ⵙ ⵉⵄⵓⵔⵔⵎⴰ ⵜⴰⴷⵖⵔⴰⵏⵜ. ⵙ ⵎⴽ ⴰⴷ ⵜⴳⴰ ⵜⵥⵓⵕⵉ ⵢⴰⵏ ⵡⵓⴷⵎ ⵙⴳ ⵡⵓⴷⵎⴰⵡⵏ ⵏ ⵜⵎⵜⵜⵉ ⵏⵏⵖ.

ⵍⵃⵙⵏ ⴱⵍⵍⴼⵇⵇⵉⵀ ⴰⵡⴷ ⵏⵜⵜⴰⵏ ⵍⵍⵉ ⵉⴳⴰⵏ ⴰⵏⵙⵙⵉⵅⴼ ⵏ ⵓⵙⵇⵇⵉⵎ ⴰⵙⴳⴰⵡⴰⵏ ⵏ ⵙⵉⴷⵉ ⵉⴼⵏⵉ, ⵉⵏⵏⴰ: ⵎⴰⵙⴷ ⴰⵢⵍⵍⵉ ⴰⵖ ⵉⵙⵎⵓⵏⵏ ⵏⴽⴽⵯⵏⵉ ⵏ ⵉⵎⴰⵙⵜⴰⵢⵏ ⴷ ⵜⵉⵍⵍⴰⵍ ⵏ ⵜⵉⵎⵙⵎⵓⵏⴰⵏⵉⵏ ⵙⵉⴷⵉ ⵉⴼⵏⵉ, ⵉⴽⵛⵎ ⴳ ⵡⴰⵍⵍⴰⵍ ⵙ ⵜⵣⵎⵎⴰⵔ ⵏ ⵜⵄⵓⵔⵔⵎⴰ ⵜⴰⴷⵖⵔⴰⵏⵜ ⴷ ⵜⵏⴼⵍⵉⵜ ⵜⴰⵏⴰⵎⵓⵏⵜ ⴷ ⵓⵙⵖⵓⴷⵓ ⵏ ⵜⵣⵎⵎⴰⵔ.

ⵉⵙⵎⴷ ⵍⵃⵙⵏ ⴱⵍⵍⴼⵇⵇⵉⵀ ⵢⵉⵏⵉ, ⵎⴰⵙⴷ ⵜⴰⵎⵙⵎⵓⵏⵜ ⵏ ⵉⵙⵏⵉ ⵏ ⵡⵓⵔⵖ ⵉ ⵜⵖⵔⵎⵜ ⵏ ⵙⵉⴷⵉ ⵉⴼⵏⵉ ⵢⵓⵙⵉ ⵜⵓⴳⵜ ⵏ ⵜⵎⵉⵜⴰⵔ, ⵜⴰⵎⵣⵡⴰⵔⵓⵜ ⵜⴳⴰ ⵜⵜ ⵜⵡⵉⵙⵉ ⴳ ⵓⵙⵖⵓⴷⵓ ⵏ ⵜⵏⴼⵍⵉⵜ ⵜⴰⴷⵍⵙⴰⵏⵜ ⴷ ⵉⵙⴽⴽⵉⵏⵏ ⵉⴷⵖⵔⴰⵏⵏ, ⴷ ⵓⵙⵖⵓⴷⵓ ⵏ ⵜⵣⵎⵎⴰⵔ ⵏ ⵜⴰⵔⵡⴰ ⵏ ⵜⵎⵏⴰⴹⵜ ⴳ ⵢⵉⴳⵔ ⵏ ⵜⴷⵍⵙⴰ ⴷ ⵜⵥⵓⵕⵉ.

ⵎⴽ ⴷⴰ ⵉⴳⴰ ⵎⴰⵙⵙ ⴰⵏⵙⵙⵉⵅⴼ ⵜⴰⵣⴰⵣⵉⵜ ⴰⴷ, ⴷ ⵢⴰⵜ ⵜⵣⴰⵣⵉⵜ ⵏ ⵜⵥⵓⵕⵉ ⴷ ⵙⵙⵉⵏⵉⵎⴰ ⴷ ⵓⵙⵏⴼⵍⵓⵍ ⴰⵏⴰⴼⴳⴰⵏ, ⵉⵜⵜⴰⵡⵙⵏ ⵉ ⵓⵙⵇⵇⵉⵎ ⴼ ⴰⴷ ⴷ ⵉⵙⵏⴼⴰⵍⴰⵍ ⴰⵢⵍⵍⵉ ⵙ ⵜⴱⵖⵔ ⵜⵎⵏⴰⴹⵜ ⵏⵏⵙ, ⵙ ⵜⵣⵎⵎⴰⵔ ⵜⵉⴷⴰⵎⵙⴰⵏⵉⵏ ⴷ ⵜⵉⵏⴰⵎⵓⵏⵉⵏ ⴷ ⵜⵉⴳⴰⵎⴰⵏⵉⵏ, ⵎⴰ ⴰⵏⵏ ⵏⵉⵜ ⴰⵔ ⴰⴷ ⵉⵙⴱⵓⵖⵍⵓ ⴰⴷⵡⴰⵙ ⵏ ⵜⵎⵏⴰⴹⵜ.

ⵜⵜⵓⵥⵍⴰⵢ ⵜⵙⴷⴰⵡⵉⵜ ⵏ ⵓⵏⴱⴷⵓ ⵏ ⵙⵉⴷⵉ ⵉⴼⵏⵉ, ⵍⵍⵉ ⵉⵜⵜⵓⵙⴽⴰⵔⵏ ⵙ ⵡⴰⵏⵏⴰⵍ ⵏ ⵜⵏⵖⵍⴰⴼⵜ ⵏ ⵜⵙⴳⴰ ⵏ ⵙⵉⴷⵉ ⵉⴼⵏⵉ ⴷ ⵓⵙⵇⵇⵉⵎ ⴰⵎⵏⴰⴹ ⵏ ⵙⵉⴷⵉ ⵉⴼⵏⵉ, ⴷ ⵙ ⵜⵡⵉⵙⵉ ⵏ ⵜⴳⵔⴰⵡⵜ ⵏ ⵙⵉⴷⵉ ⵉⴼⵏⵉ, ⴳ ⵜⵉⵏⴰⵡⵜ ⵜⴰⵏⴰⵎⵓⵔⵜ ⴷⴷⴰⵡ ⵓⵙⵏⵜⵍ “ⵜⴰⵎⵖⴰⵔⵜ ⴳ ⵙⵙⵉⵏⵉⵎⴰ ⵜⴰⵎⴰⵣⵉⵖⵜ” ⵍⵍⵉ ⵎⵓ ⵜⵃⵉⵢⵢⵜ ⵜⵎⵙⵎⵓⵏⵜ ⵏ ⵉⵙⵏⵉ ⵏ ⵡⵓⵔⵖ ⵜⵓⴳⵜ ⵏ ⵉⵎⵔⵣⵓⵜⵏ ⴷ ⵉⵎⴰⵥⵍⴰⵢⵏ ⵏ ⵙⵙⵉⵏⵉⵎⴰ ⴷ ⵉⵙⴳⴱⴰⵔⵏ ⴷ ⵉⵎⴰⵔⴰⵢⵏ ⵏ ⵙⵙⵉⵏⵉⵎⴰ ⵜⴰⵎⴰⵣⵉⵖⵜ, ⵍⵍⵉ ⴳ ⵜⵥⵥⵏⵥⵕ ⵜⵉⴼⴰⵡⵜ ⴼ ⵜⵉⵍⴰⵍ ⵏ ⵜⵎⵖⴰⵔⵜ ⵜⴰⵎⴰⵣⵉⵖⵜ ⴳ ⵓⵙⵖⵓⴷⵓ ⵏ ⵙⵙⵉⵏⵉⵎⴰ ⵜⴰⵎⴰⵣⵉⵖⵜ.

ⴷ ⵎⴽ ⵍⵍⵉ ⴱⴷⴷⴰ ⵜⵜⴰⵣⵣⴰⵍ ⵜⵎⵙⵎⵓⵏⵜ ⵏ ⵉⵙⵏⵉ ⵏ ⵡⵓⵔⵖ ⴼ ⵓⵙⵎⵓⵜⵜⴳ ⵏ ⵜⵄⵓⵔⵔⵎⴰ, ⵜⵙⵏⵎⴰⵍⴰ ⵜⵓⴳⵜ ⵏ ⵉⵄⵔⵔⵉⵎⵏ ⵏ ⵙⵉⴷⵉ ⵉⴼⵏⵉ, ⴳ ⵢⵉⴳⵔ ⵏ ⵙⵙⵉⵏⵉⵎⴰ ⴷ ⵓⵙⵓⵍⵍⴼ ⵙ ⵓⵜⵉⵍⵉⴼⵓⵏ ⴷ ⵓⵙⵓⴼⴼⵖ ⵏ ⵉⵙⵓⵔⴰ ⴷ ⵓⴳⵔⴰⴼⵉⴽ, ⵎⴽ ⵍⵍⵉ ⵜⴼⵙⵔ ⴳ ⵓⵙⴰⵔⴰⴳ ⵏ ⵜⴷⴰⵍⴰ ⵏ ⵍⵎⴰⵙⵉⵔⴰ ⵍⵅⴹⵕⴰ, ⴰⵙⵏⴼⵍⵓⵍ ⴰⴼⵓⵜⵓⴳⵔⴰⴼ ⵏ ⵢⵉⵡⵉⵙ ⵏ ⵜⵎⵏⴰⴹⵜ ⴰⴷ.
ⵉⵇⵇⴰⵏ ⴷ ⴰⴷ ⵏⵉⵏⵉ: ⵎⴰⵙ ⵜⴳⴰ ⵜⵉⵏⵏⴰⵡⵜ ⵜⴰⵏⴰⵎⵓⵔⵜ ⵢⴰⵜ ⵜⴳⵎⵎⵓⵜ ⵏ ⵜⵡⵉⵙⵉ ⵏ ⵜⵓⴳⵜ ⵏ ⵉⵎⵔⵣⵓⵜⵏ ⴷ ⵉⵏⴼⵔⴰⵏⵏ,ⵍⵍⵉ ⵏⵉⵜ ⵉⴳⴳⵓⵔⴰⵏ ⵙ ⵓⴼⵙⴰⵔ ⵏ ⵢⴰⵏ ⵓⴷⵍⵉⵙ ⵉⴳⴰⵏ ⴰⴽⵙⵡⴰⵜ ⵍⵍⵉ ⴳ ⵎⵓⵏⵜ ⵜⵣⵔⴰⵡⵉⵏ ⵏ ⵉⵎⵔⵣⵓⵜⵏ ⵍⵍⵉ ⵙⵙⴰⵔⵏⵉⵏ ⴳ ⵜⵉⵏⵏⴰⵡⵉⵏ ⵏ ⵉⵎⵓⵙⵙⵓⵜⵏ ⵏ ⵜⵙⴷⴰⵡⵉⵜ ⵏ ⵉⴼⵏⵉ, ⴰⴷⵍⵉⵙ ⴰⴷ ⵢⵓⵙⵉ ⵜⴰⵏⵏⴰⵢⵉⵏ ⵏⵏⴰ ⴷ ⵥⵎⴰⵏ ⵉⵎⵔⵣⵓⵜⵏ ⴳ ⵉⵙⵓⵔⴰ ⵏ ⵜⵎⴰⵣⵉⵖⵜ. ⴷ ⵎⴽ ⴷⴰ ⴳⴰⵏ ⵙⴳ ⵡⵉⵍⵍⵉ ⴷ ⵜⵉⵍⵍⵉ ⴷⵓⵍⵏⵉⵏ ⵙ ⵓⵙⵇⵇⵙⵉ ⵏ ⵜⵎⵖⴰⵔⵜ.

ⵎⴽ ⴷⴰ ⵉⵕⵥⵎ ⵓⵙⵎⵓⵜⵜⴳ ⵏⵏⴰ ⵜⴳⴰ ⵜⵎⵙⵎⵓⵏⵜ ⵉⵙⵏⵉ ⵏ ⵡⵓⵔⵖ ⵢⵉⵖⵎⵎⵉⵔⵉⵏ ⵍⵍⵉ ⵉⵙⵔⵙⵏ ⴼ ⵜⵉⵔⵔⴰ ⵜⵉⵎⵥⵕⵉⵜ ⵏ ⵜⵎⴽⵜⵉⵜ ⴳ ⵓⵙⴰⵔⵓ ⵓⵏⵜⵉⵍ ⴷ ⵜⵥⵓⵕⵉ ⵏ ⵓⵙⵓⵍⴼ ⵙ ⵓⵜⵉⵍⵉⴼⵓⵏ.

ⵜⴰⴳⴰⵔⴰ ⵏ ⵉⵎⵓⵙⵙⵓⵜⵏ ⵏ ⵜⵙⴷⴰⵡⵉⵜ ⵏ ⵓⵏⴱⴷⵓ ⵏ ⵙⵉⴷⵉ ⵉⴼⵏⵉ, ⵉⵕⵥⵎ ⵜⴰⴳⴳⵓⵔⵜ ⴼⴰⴷ ⴰⴷ ⵏⵙⴰⵇⵇⵙⵉ ⴰⴼⴰⵔⵙ ⴰⵏⴳⵎⴰⵏ, ⵎⴰⵏⵉ ⵉⵍⴽⵎ ⴳ ⵜⵎⵏⴰⴹⵜ. ⴳ ⵜⵉⵣⵉ ⵍⵍⵉ ⵙ ⵓⵔ ⵏⵓⴼⵉ ⴰⵎⵔ ⴰⴷ ⵏⵙⵓⵜⵜⴳ ⵜⵉⵣⵎⵎⴰⵔ ⵜⵉⵏⴼⵍⴰⵏⵉⵏ ⵏ ⵜⵖⵔⵎⵜ ⵏ ⵙⵉⴷⵉ ⵉⴼⵏⵉ, ⵜⵉⵣⵉ ⵍⵍⵉ ⵜⵙⵓⵔ ⴼ ⵜⵓⴳⵜ ⵏ ⵜⵣⵎⵎⴰⵔ ⵜⵉⵏⴼⵍⴰⵏⵉⵏ ⴼⵍⵏⵉⵏ ⴰⴷⵔⵉⵣ ⴳ ⵜⵡⴰⴷⴰ ⵜⴰⵏⴼⵍⴰⵏⵜ ⵏ ⵙⵉⴷⵉ ⵉⴼⵏⵉ. ⵎⴽ ⵍⵍⵉ ⵏⵏ ⵜⵖⵎⵎⴰⵛ ⴰⴷ ⵜⵙⵙⵉⵡⴹ ⵜⴰⵏⴼⵍⵉⵜ ⵍⵍⵉ ⴼ ⵜⵙⵡⵓⵔⵉ ⴰⵔ ⴰⵙⵡⵉⵔ ⵏ ⵜⵙⴳⴰ ⴷ ⴰⴷ ⵏⵏ ⵜⵕⵥⵎ ⴼ ⵓⵎⴰⴹⴰⵍ. ⴰⵙⵙ ⴰⴷ ⴰⵎⴳⴳⴰⵢ ⴰⵏⴼⵍⴰⵏ ⵍⵍⵉ ⴼ ⵜⵍⵍⴰ ⵜⵎⴰⵙⵙⴰⵢⵜ ⵏ ⵜⵏⴼⵍⵉⵜ ⵜⴰⴷⵍⵙⴰⵏⵜ, ⵉⵜⵜⵖⵉ ⴼ ⴰⴷ ⵉⵙⵎⴷ ⵜⴰⵡⴰⴷⴰ ⵏⵏⵙ ⴳ ⵓⴱⵔⵉⴷ ⴰⴷ, ⴼⴰⴷ ⴰⴷ ⵉⵙⵖⵓⴷⵓ ⵜⵓⵙⴽⵉⵡⵉⵏ ⵜⵉⴷⵍⵙⴰⵏⵉⵏ, ⵙⵍⴰⵡⴰ ⵏⵏ ⴰⴽⴽⵯ ⵍⵍⵉⵖ ⵉⵙⵖⵓⴷⴰ ⵉ ⵜⵖⵔⵎⵜ ⵏ ⴰⵢⵜ ⴱⴰⵄⵎⵔⴰⵏ ⵜⵉⴷⴰⵍⵉⵡⵉⵏ ⵏ ⵙⵙⵉⵏⵉⵎⴰ ⵉⵍⵍⴰⵏ ⴳ ⵓⵙⵡⵉⵔ ⵏ ⵓⵎⵣⵔⵓⵢ ⵏⵏⵙ.

ⵕⴰⵛⵉⴹ ⵎⵓⵜⵛⵓ
ⴰⵏⵙⵙⵉⵅⴼ ⵏ ⵜⵎⵙⵎⵓⵏⵜ ⵉⵙⵏⵉ ⵏ ⵡⵓⵔⵖ