ⴰⴹⵕⵉⵚ ⵙ ⵜⵄⵕⴰⴱⵜ: ⵉⵜⵔⵉ ⵎⵓⵏⵟⴰⵚⵉⵕ ⵉⵙⵓⵖⵍ ⵜ: ⵄⴱⴷⵍⵡⴰⵃⵉⴷ ⴱⵓⵜⴱⴰⵖⴰ

ⵜⵙⴷⵍ ⵜⵖⵔⵎⵜ ⵏ ⵓⴳⴰⴷⵉⵔ ⵙⴳ 03 ⴰⵔ 07 ⵎⴰⵢⵢⵓ 2023 ⵉ ⵉⵎⵓⵙⵙⵓⵜⵏ ⵏ «ⵜⴰⵍⵡⵉⴽⴰⵏⴷ» ⵏⵏⴰ ⵉⵙⵙⵎⵏⵉⴷⵏ ⵉⵅⴼ ⵏⵏⵙ ⴰⵎ ⴰⵙⵏⴼⴰⵔ ⴰⴷⵍⵙⴰⵏ ⵉⴱⴷⴷⵏ ⴼ ⵉⵅⴼ ⵏⵏⵙ, ⵓⵔ ⵉⴷⵔⵓⵙ ⵓⵙⴽⴽⵉⵏ ⵏⵏⵙ ⵅⴼ ⵜⵙⵏⵜⴰⵢ ⵜⵉⴷⵍⵙⴰⵏⵉⵏ ⵜⵉⵣⴰⵢⴽⵓⵜⵉⵏ, ⴷ ⵉⴽⵛⵎ ⴳ ⵜⵎⵜⵔⴰⵔⵜ ⵜⴰⴷⵍⵙⴰⵏⵜ ⴷ ⵓⵙⵙⵓⵜⵍ ⵚⵓⵚⵢⵓ ⴰⴼⵔⴽⴰⵏ.

ⵉⵎⵓⵙⵙⵓⵜⵏ ⵏ «ⵜⴰⵍⵡⵉⴽⴰⵏⴷ» ⴷ ⴰⵙⴼⵓⴳⵍⵓ ⵉⵙⵎⴰⵢⵏⵓⵏ ⵙ ⵜⵎⵙⵙⵓⵙⵔⴰⵔⵜⵉⵏ ⵉⴷⴷⵔⵏ ⴷ ⵉⴼⵙⴰⵔⵏ ⵏ ⵜⵙⵓⴽⵜ ⴷ ⵜⵎⴽⵜⵉⵜ ⵏ ⵡⴰⵏⵙⴰⵜⵏ ⴷ ⵓⵙⴽⴰⵔ ⵏ ⵉⵙⴰⵢⵔⴰⵔⵏ ⵏ ⵓⵙⵏⴼⵍⵓⵍ ⴷ ⵉⴼⵙⴰⵔⵏ ⵏ ⵓⵥⴰⵡⴰⵏ ⴷ ⵉⵙⴰⵡⵔⵏ ⵉⵙⵎⴰⵜⵜⴰⴳⵏ ⴷ ⵉⴷⵍⵙⴰⵏⵏ ⴷ ⵉⵜⵉⵇⵏⵉⵢⵏ (ⵜⴰⵙⴰⵡⵔⵜ ⵏ ⵍⴽⵓⵔⵉⴳⵕⴰⴼⵢⴰ, ⵜⴰⵙⴰⵡⵔⵜ ⵏ ⵓⵙⴽⴰⵔ ⵏ ⵜⵓⵎⴰⵢⵜ, ⵜⴰⵙⴰⵡⵔⵜ ⵏ ⵍⵎⴰⴽⵢⴰⵊ ⵏ ⵙⵙⵉⵏⵉⵎⴰ ⴷ ⵓⵎⵣⴳⵓⵏ, ⵜⴰⵙⴰⵡⵔⵜ ⵏ ⴼⵓⵟⵓⵖⵕⴰⴼⵢⴰ, ⴷ ⵓⵙⴼⵙⵔ ⴰⵎⵡⴰⵍⴰⵏ ⵉ ⵓⵙⵙⵏⵛⴽ ⴷ ⵓⴷⵍⵉⵙ ⵉⵜⵜⵢⴰⵡⵙⵙⵎⵔⴰⵙⵏ, ⴷ ⵓⵙⴰⵢⵔⴰⵔ ⵏ ⵉⵢⴰⴼⵓⵜⵏ ⵉⴼⵔⴽⴰⵏⵏ ⵉⴷⵖⵔⴰⵏⵏ).

ⴰⵡⵜⵜⴰⵙ ⵏ ⵜⵙⴰⵡⵔⵉⵏ ⴰⴷ ⵜⵉⵎⵙⵏⴼⵍⴰⵍ, ⵙ ⴰⵢⵍⵍⵉ ⵏⵏⴰⵏ ⵡⵉⴷ ⴼⵍⵍⴰⵙ ⴱⴷⴷⵏⵉⵏ ⴷ ⴰⵙⵎⴰⵢⵏⵓ ⵏ ⵜⵣⴷⴰⵢⵜ ⵜⴰⵥⵓⵕⴰⵏⵜ ⴷ ⵜⵥⵉⵍⵜ ⴳ ⵡⵓⵙⵓⵏ ⵏ ⵜⴰⵍⴱⵕⵊⵜ ⴰⵎ ⴰⴳⵣⵣⵓⵎ ⵓⵔ ⵢⴰⵟⵟⴰⵏ ⵙⴳ ⵜⵎⴽⵜⵉⵜ ⵏ ⵜⵖⵔⵎⵜ ⴷ ⵓⵥⵟⵟⴰ ⵏ ⵜⵎⵢⵓⵔⵉⵏ ⵜⵉⴷⵍⵙⴰⵏⵉⵏ ⵜⵉⵎⴰⵢⵏⵓⵜⵉⵏ ⴳ ⵜⴷⵔⴰⵡⵜ ⵜⴰⵎⵙⴽⴰⵔⵜ ⴷ ⵜⵎⵙⵢⴰⴼⵓⵜ ⴳ ⵓⵙⴽⴰⵔ ⵏ ⵜⵎⵙⵙⵓⵙⵔⴰⵔⵜ. ⵜⵙⵎⴰⵏⴰⵔ ⵎⴰⵙ ⴷ ⵜⵓⴳⴳⴰⵙ ⴷ ⵜⵡⵏⴳⵉⵎⵉⵏ ⴷ ⵉⵙⴰⵖⵓⵍⵏ ⵏ ⵜⵎⵙⵎⵓⵏⵜ ⴰⴳⴰⴷⵉⵔ ⵎⵉⵎⵓⵔⵉ, ⵓⵔ ⴱⴷⴷⵏⵜ ⵖⴰⵙ ⴳ ⵓⵡⵜⵜⵓ ⴰⴷ, ⵎⴰⵛⴰ ⵜⵣⵣⵔⵉ ⵜ ⵙ ⵓⵙⵙⵉⵔⵡ ⴰⵢⵍⵍⵉ ⵉⵜⵜⴰⵊⵊⴰⵏ ⵜⴰⵍⴱⵕⵊⵜ ⵙ ⵓⵙⵡⵉⵏⴳⵎ ⵏⵏⵙ ⴰⴷⵓⴳⴰⵎ ⴷ ⵉⵎⵏⴰⴷⵏ ⵏⵏⵙ ⵏ ⵜⵥⵉⵍⵜ ⴰⴷ ⵉⴳ ⵢⴰⵏ ⴳ ⵉⵎⴰⵏⴰⵔⵏ ⵉⴷⵍⵙⴰⵏ ⴳ ⵓⵙⵡⵉⵔ ⴰⴷⵖⵔⴰⵏ ⴷ ⵓⵏⴰⵎⵓⵔ ⴷ ⵓⴳⵔⴰⵖⵍⴰⵏ.

ⵉⵍⵍⴰ ⴳ ⵓⵖⴰⵡⴰⵙ ⴰⵎⴰⵜⴰⵢ, ⵙⴳ ⴰⵢⵍⵍⵉ ⴷ ⵢⵉⵡⵉ ⵓⵖⴱⴰⵍⵓ, ⵜⵉⵍⴰⵍ ⵜⵉⵥⵓⵕⴰⵏⵉⵏ ⵜⵉⵎⵙⴷⴰⵖ ⵉⵙⵙⴷⵓⵙⵏ ⴰⵏⵏⵓⵕⵥⵎ ⵏ ⵡⵓⵙⵓⵏ ⵏ ⵜⴰⵍⴱⵕⵊⵜ ⵅⴼ ⵓⵏⵎⵉⵍⴰ ⴰⵎⴰⵜⴰⵢ, ⵙ ⵜⵡⵉⵍⴰ ⵏ ⵜⵎⵙⵙⵓⵙⵔⴰⵔⵉⵏ ⴷ ⵉⵙⴼⵙⴰⵔⵏ ⴷ ⵜⵙⴰⵡⵔⵉⵏ ⵏⵏⴰ ⵙⴳⴷⵍⵏ ⵉⵙⴰⵢⵔⴰⵔⵏ ⵉⵎⵏⵏⴰⵡⵏ ⴳ ⵡⵓⵙⵓⵏ ⵏ ⵜⴰⵍⴱⵕⵊⵜ, ⵏⵏⴰ ⵉⵜⵜⵚⴽⵓⵏ ⵢⴰⵏ ⵓⵙⴳⵓⴷⵉ ⴰⴼⵕⵕⴰⵊ ⵉ ⵉⵥⵉⵕ ⵏ ⵜⵉⵔⵎⵉⵜⵉⵏ ⵜⵉⴷⵖⵔⴰⵏⵉⵏ ⴷ ⵜⴳⵔⴰⵖⵍⴰⵏⵉⵏ ⵏ ⵜⵎⵙⵙⵓⵙⵔⴰⵔⵉⵏ ⵉⴷⴷⵔⵏ ⴷ ⵜⵡⴰⵖⵉⵜⵉⵏ ⵜⵉⵜⵔⴰⵔⵉⵏ ⴳ ⵓⵙⵕⴽⴹ ⴰⵜⵔⴰⵔ ⴷ ⵍⴽⵓⵕⵉⴳⵕⴰⴼⵢⴰ ⴷ ⵓⵙⴽⴰⵔ ⵏ ⵜⵓⵎⴰⵢⵜ ⴷ ⵍⴼⵓⵜⵓⵖⵕⴰⴼⵢⴰ ⴷ ⵓⵙⵙⵔⴽⵎ ⴰⵎⵣⴳⵓⵏ.

ⵜⵥⵍⵉ ⵜⵙⵙⵓⵜⵍ ⴰⴷ ⵙ ⵓⵙⴱⵔⵔⴽ ⵙ ⵜⴰⵢⵙⵉ ⵏ ⵜⵖⵔⵎⵜ ⵏ ⵜⵣⵏⵉⵜ ⵜⴰⵣⴰⵢⴽⵓⵜ ⵏⵏⴰ ⴷⴰⵔ ⵜⴰⴳⵯⵎⴰⵏⵉⵜ ⵜⴰⴷⵍⵙⴰⵏⵜ ⴷ ⵜⴷⵓⴳⴰⵎⵜ ⴷ ⵜⴰⵢⵙⵉ ⵏ ⵙⵓⵙ ⵜⴰⵎⴰⵙⵙⴰⵏⵜ ⵙⴳ ⵓⵙⵏⵎⵉⵍⵉ ⵏ ⵓⵙⴼⵙⴰⵔ ⵏ ⵉⵢⴰⴼⵓⵜⵏ ⵉⴼⵔⴽⴰⵏⵏ ⵜⵉⵣⵉ ⵏ ⵡⵓⵙⵙⴰⵏ ⵏ ⵜⴰⵍⵡⵉⴽⴰⵏⴷ. ⵉⴳ ⴰⵙⵉⵜⴳ ⴷ ⵓⴼⵔⴰⴳ ⵏ ⵡⴰⵢⴷⴰ ⴰⴷⵍⵙⴰⵏ ⵡⴰⵔ ⴰⴽⵎⴰⵎ, ⴷ ⵓⵙⵏⵜⵉ ⵏ ⵜⵎⴰⴳⵓⵜ ⵜⴰⴷⵍⵙⴰⵏⵜ ⴷ ⵜⵥⵓⵕⴰⵏⵜ ⵏⵏⴰ ⵙ ⵜⴽⵜⴰⵔ ⵜⴳⵎⵎⵉ ⵜⴰⵎⴰⵣⵉⵖⵜ ⵉⵎⵇⵇⵓⵔⵏ ⴳ ⵓⵣⴷⴰⵡ ⵏⵏⵙ ⴰⴼⵔⴽⴰⵏ ⴷ ⵜⵎⵉⵜⴰⵔ ⵜⵉⴷⵍⵙⴰⵏⵉⵏ ⴷ ⵜⵉⵏ ⵜⵎⴰⴳⵉⵜ.

ⵙⵙⴽⵕⵥⵏ ⵉⵎⵙⵓⴷⴰⵙ ⵅⴼ ⵎⴰⵙ ⴷ ⵜⴰⵍⵡⵉⴽⴰⵏⴷ ⵓⵔ ⵙⵓⵍ ⵜⴳⵉ ⵖⴰⵙ ⴰⵏⵎⵓⵇⵇⴰⵔ ⴰⵏⵎⵍⴰⵙⵙ ⵉⴽⵜⴰⵔⵏ ⵙ ⵜⵎⵙⵙⵓⵙⵔⴰⵔⵉⵏ ⵉⴷⴷⵔⵏ ⵎⴰⵛⴰ ⵉⴳⴰ ⴰⵎⴰⵏⴰⵔ ⵉⵙⴼⵓⴳⵍⵓⵏ ⵙ ⵓⴼⴳⴰⵏ ⵙ ⵜⵣⴷⴰⵢⵜ ⵏⵏⵙ ⴷ ⵓⵙⴰⵢⵔⴰⵔ ⴰⴳⴷⵓⴷⴰⵏ ⴷ ⵙ ⵜⵎⴽⵜⵉⵜ ⵜⴰⴳⵔⴰⵡⴰⵏⵜ ⴷ ⵡⴰⵏⴰⵡⵏ ⵉⵎⵏⵏⴰⵡⵏ ⵏ ⵡⴰⵍⵍⴰⵙ ⴷ ⵏ ⵜⵡⴰⵖⵉⵜ, ⴷ ⵜⵜⵏⵔⴰ ⵉ ⵉⵎⵏⵣⴰⵢⵏ ⵏ ⵓⵎⵙⴰⵡⴰⵍ ⴷ ⵓⵏⴳⴷⵍⵙⴰⵏ ⴷ ⵓⵎⵢⴰⵏⴰⵡ ⴷ ⵓⵙⵡⵉⵏⴳⵎ ⵏ ⵓⵎⵣⴰⵔⴰⵢ.

ⵉⴳⴰ ⴰⴷⴷⵓⵔ ⵉ ⵓⴳⴰⴷⵉⵔ ⵎⵉⵎⵓⵔⵉ ⴰⴷ ⵜⵙⴱⵔⵔⴽ ⵉⵎⴷⴷⵓⴽⴽⵯⴰⵍ ⴷ ⵉⵎⴰⴷⵔⴰⵡⵏ ⵜⵙⵎⵓⵏ ⵜⵏ ⵜⴷⵍⵙⴰ ⵜⴰⵎⴰⴷⵔⴰⵡⵜ, ⵙ ⵓⵎⴷⵢⴰ ⴰⵙⵉⵏⴰⴳ ⴰⴼⴰⵕⴰⵏⵚⵉ ⴳ ⵓⴳⴰⴷⵉⵔ ⴷ ⵜⵉⵣⵟⴰⵍⵓⵏ ⴷ ⵏⵓⵊⵓⵎ ⵙⵓⵙ, ⴷ ⵓⵙⴷⵓⵙ ⵏ ⵓⵙⵏⴼⵍ ⴰⴷⵍⵙⴰⵏ ⴰⴽⴷ ⴷⵉⴷⵙⵏ ⴰⴼⴰⴷ ⴰⴷ ⵉⵜⵜⵓⴼⴽⴰ ⵉ ⵓⵏⵎⵓⵇⵇⴰⵔ ⴰⴷ ⵢⴰⵏ ⵓⴼⵔⵉⵙ ⴰⴳⵔⴰⵖⵍⴰⵏ.

ⵎⴽⵍⵍⵉ ⵔⴰⴷ ⵉⵜⵜⵓⵙⴽⴰⵔ ⵓⵙⵙⵎⵖⵔ ⵉ ⵉⴷⵓⴳⴰⵎⵏ ⵉⵎⴰⵏⴰⵔⵏ ⵏ ⵜⵎⵥⵕⵉⵜ ⵜⴰⴷⵍⵙⴰⵏⵜ ⴳ ⵜⵖⵔⵎⵜ ⵏ ⵓⵎⵓⵖⵍⵉ ⵉⴳ ⴰⵙⵓⴳⵔ ⵉ ⵓⵙⴰⴽⴰ ⵏⵏⵙⵏ ⴰⴷⵍⵙⴰⵏ ⴷ ⵓⵙⵉⵜⴳ ⵉ ⵜⵉⴽⴽⵉ ⵏⵏⵙⵏ ⵜⴰⵡⵏⴳⵉⵎⵜ ⴳ ⵢⵉⴳⵔ ⵏ ⵓⵙⵎⵓⵏ ⴷ ⵓⵏⵜⴰⵎ ⵏ ⵢⴰⵏ ⵓⴳⵣⵣⵓⵎ ⵙⴳ ⵜⵎⴽⵜⵉⵜ ⵏ ⵜⵖⵔⵎⵜ ⵙⴳ ⵉⵙⴳⴳⵯⴰⵙⵏ ⵏ ⵜⵎⴽⴽⵓⵣⵉⵏ ⵏ ⵜⴰⵙⵓⵜ ⵉⵣⵔⵉⵏ, ⵉⵥⵍⵉ ⵓⵢⴰ ⴷ ⵙ ⵉⵙⵍⵎⴰⴷⵏ ⵍⵃⵙⵏ ⵔⵔⵙⴰⴼⵉ, ⵄⴱⴹⵍⵍⴰⵀ ⴽⵉⴽⵔ ⴷ ⵉⵄⵣⵣⴰ ⵊⴰⴼⵉⵔⵉ, ⵔⴰⴷ ⵉⵜⵜⵓⵙⴽⴰⵔ ⵓⵙⵙⵎⵖⵔ ⴰⴷ ⵙ ⵜⵉⵍⵉⵜ ⵏ ⵢⴰⵜ ⵜⴷⵖⵔⵜ ⵏ ⵉⵎⴷⵍⴰⵙⵏ ⵏ ⵜⵖⵔⵎⵜ ⴷ ⵓⴳⴷⵓⴷ ⵏ ⵜⴰⵍⵡⵉⴽⴰⵏⴷ.